Partia Demokratike prezantoi Fisnik Qosen si drejtues politik për Kavajën dhe Rrogozhinën, ku ishin të pranishëm edhe eksponentë të lartë të PD. Drejtuesi politik për Tiranën, Belind Këlliçi u shpreh se beteja bëhet për t’i kthyer Shqipërinë shqiptarëve.
Këlliçi solli në vëmendje fitoren e Donald Trump në SHBA, të cilin e konsideroi si aleat në krahun e PD. Ish deputeti demokrat deklaroi se Shqipërinë dhe demokratët i presin ditë më të mira.
Ai u shpreh se Partia Demokratike është e vetmja shpresë për shqiptarët, të cilët gjatë qeverisjes së PS janë larguar nga vendi.
“Ne vijojmë të jemi në betejë në Tiranë, dhe do vazhdojmë betejën derisa bashkia e Tiranës ti kthehet qytetarëve. Pas Veliajt, radhën e ka Edi Rama, kreu i narkoshteti të parë në Evropë, i konsideruar i tillë jo nga ne, por nga mediat ndërkombëtare.
Në 11 vite Shqipëria është shpopulluar, Kavaja është shpopulluar. PD mbetet e vetmja shpresë për çdo qytetar të ndershëm që ka vendosur të punojë këtu me djersën e ballit.
Beteja jonë do të bëhet për t’i rikthyer Shqipërinë shqiptarëve. Tashmë me një aleat të shtuar në krahun tonë, presidentin Trump dhe qeverisjen e ardhshme në SHBA.
Dita kur merreshin vendime kundër PD, kur tentohej të shuhej opozita ka marrë fund. Ditë të mira pritet të vijnë për demokratët dhe për Shqipërinë”, tha Belind Këlliçi.
