Gjatë inspektimit të punimeve për rikualifikimin e bllokut urban në lagjen e Thesarit, kryetari i Bashkisë së Tiranës, Erion Veliaj ftoi të gjithë fëmijët e shkollave në këtë zonë, që të ndjekin kurset falas të Qendrës Tumo. Ai tha se një investim kaq i madh, që financohet nga Bashkia e Tiranës, duhet të shfrytëzohet nga të gjithë fëmijët.
“Do vazhdojmë të marrim hapësira me qira për çerdhe dhe kopshte të tjera, duke qenë se lagjja po rritet, por e mira s’ka fund. Unë dua t’ju ftoj që fëmijët e Freskut dhe të gjithë zonave periferike të Tiranës të përfitojnë nga të njëjtat të mira që po përfitojnë fëmijët e qendrës. Nxënësit më të mirë të shkollave “Klodian Tanushi”, “Luan Hajdaraga”, apo të shkollës së re në Surrel, s’kanë asnjë arsye pse të mos shkojnë te Qendra Tumo, të marrin kurse falas, të cilat paguhen 100% nga Bashkia e Tiranës”, tha kryebashkiaku.
Duke u ndalur te subvencionimi i kurseve digjitale në Qendrën Tumo, Veliaj theksoi se nga viti i ardhshëm do të përfitojnë abonetë falas edhe pensionistët, ndërkohë që nga shtatori tjetër fëmijët në shkolla do kenë ushqim falas.
“Vitin tjetër subvencionojmë abonetë falas për pensionistët, por do subvencionojmë edhe ushqimin në shkolla për fëmijët. Sot që kemi lagjen e fundit që po e mbyllim, mund të fokusohemi në shumë tema sociale, siç është ndërtimi i qendrës për autizmin etj, që i kemi vërtet për zemër, por vetëm tani kemi mundësinë që t’i përballojmë me buxhetin e Tiranës. Do bëjmë një minifushatë me të gjitha njësitë administrative ku të themi: Zgjidhëm infrastrukturën horizontale, kemi zgjidhur infrastrukturën vertikale, por tani duhet të zgjidhim ‘infrastrukturën e mentalitetit’ dhe punëve që dimë të bëjmë. Kemi fëmijë të jashtëzakonshëm dhe me talent. Siç po përfiton 70% që jeton në Tiranën urbane, edhe ky 30% në Tiranën rurale duhet të ketë të njëjtin shans. Në finale, të fitojë më i miri, por startin ta kenë të gjithë të barabartë”, u shpreh Veliaj.
