Përse mungojnë paratë në kampionatin shqiptar, eksperti Soko: Duhet kapital i madh dhe kohë

Financat në futboll ishin kryefjalë në emisionin “Max Sport” në Euronews Albania, moderuar nga Altin Sulçe dhe Klaudja Jazexhi.
Eksperti i ekonomisë, Pano Soko, tregoi arsyet pse në futbollin shqiptar mungojnë investimet, duke bërë të ditur dhe rrezikun që ka ndërmarrja e një hapi të tillë.
Soko deklaroi hapat dhe mënyrën sipas tij për të qenë i suksesshëm një investim në futboll ose në sport, duke theksuar se duhet kapital i madh dhe kohë.
“Futbolli ndahet në atë tip biznesi që kërkon një investim shumë të madh paraprak. Nëse do para të shpejta, hap Fast Food ose supermarket, sepse futbolli është biznes luksi që kërkon paradhënie shuma të mëdha për të arritur suksesin. Nëse ti tenton me pak para të fitosh shumë, do të jesh i dështuar, pasi në këtë fazë biznesi është një gropë e madhe që vetëm do të thithë para dhe nuk do të japë,” tha Soko.
Pano Soko shpjegoi se, për të kuptuar filozofinë në sport, duhet të dështojnë disa njerëz dhe, kur gjërat të fillojnë me konceptin e duhur, atëherë do të kemi afrime të bizneseve të mëdha drejt sportit, sipas tij.