Mazhoranca do të falë penalitetet e vendosura në 10 vitet e fundit jo vetëm në zonat rurale por edhe në qytet dhe këtë po e bën me një nismë ligjore që u miratua në Komisionin e Ekonomisë vetëm me votat e socialistëve.
Bëhet fjalë për shfuqizimin e te gjitha masave administrative nga Inspektoriatet Vendore te Mbrojtjes se Territorit, Inspektoriatit Qendror i Mbrojtjes se Territorit, Autoriteti Kombetar i Ushqimit, Inspektoriati Shtetëror Shëndetësor në të gjithe territorin e Republikes se Shqipërisë, si dhe Policia e Shtetit dhe Policia Bashkiake.
Në komision u propozua edhe faljen e gjobave për banesat individuale në qytet.
“Të anulohen masat administrative të vendosura edhe në zona urbane për qëllime strehimi, pra, jo për pallate, por për shtëpi banimi që përdoren për qëllime strehimi individual të përfshihen në gamën e subjekteve që do të përfitojnë”, tha socialisti Erion Braçe, propozues i këtij projektligji.
Demokratët në komision e cilësuan projektligjin si iniciativë për qëllime elektorale dhe thanë se nisma është diskriminuese për disa kategori.
“Kjo është një masë elektorale po vijmë në zgjedhje dhe po nxitohet për të hedhur një karamele elektorale”, tha Edmond Spaho.
“Projekligji për falje nuk duhet të jetë diskriminues per kategorite ne nevoje mund te shtojme edhe disa nga ketegorite”, shtoi Jorida Tabaku.
Kundërshtive të demokratëve iu përgjigj nismëtari Braçe.
“As kam patur qëllim dhe as e kam përdorur për politikë këtë nismë që kemi përpara sot. Nëse do t’i qëndroj argumentit elektoral duhet t’ju them që për shkak të gjithë pasjes së gjithë pushtetit ekzekutiv ata që i bie të jenë ndëshkuar kanë qenë pala tjetër politike. Nëse do rrimë në aspekt politik më vjen keq ta them nuk janë socialistët që po përfitojnë”, tha ai.
Sipas të dhënave vetëm në vitin 2022 llogariten 1492 masa administrative gjobë për disa tipologji ndërtimesh në zonat rurale ndërsa në banesat individuale në qytet nuk ka nje shifer.
