Antonio Konte ka piketuar një prej shqiptarëve të klubit të Leçes për të përforcuar radhët e ekipit që në janar. Luis Hasa, mesfushori ofensiv i cili nuk po gjen hapësira te Leçe, është një nga emrat që trajneri i Napolit ka dhënë pëlqimin për të afruar dhe marrëveshja do të mbyllet që në javët e ardhshme.
Konfirmimi ka ardhur nga përgjegjësi i departamentit sportiv të Leçes, Pantaleo Korvino, i cili gjatë një konference për shtyp bashkë me drejtorin sportiv, ka folur ndër të tjera edhe për këtë marrëveshje të papritur për shumëkënd. Hasa është transferuar në verë nga radhët e Juventusit te Leçe, por ndonëse nuk ka luajtur rregullisht, ka tërhequr interesin e Napolit, i cili është gati të pranojë një shkëmbim lojtarësh për të siguruar mesfushorin ofensiv shqiptar i cili ka përfaqësuar Italinë në arenën ndërkombëtare me moshat.
“Kemi një marrëveshje pranë mbylljes. Një klub i rëndësishëm italian na ka kërkuar një lojtar që nuk po luan te ne. Ne kemi kërkuar një lojtar si shkëmbim apo situata të tjera për ta konkretizuar. Bëhet fjalë për Hasën”, ishin fjalët e Korvinos.
Më pas, mediat italiane kanë zbuluar se ishte Napoli klubi që e kërkonte me ngulm, duke e vlerësuar si një futbollist i cili mund të shërbente si alternativë për skemat e Kontes.
