Teksa zgjedhjet lokale të 14 majit po afrojnë, Partia Socialiste ka nisur punën nga fushata.
Ditën e djeshme PS ka publikuar emrat e kandidatëve për këshillat bashkiakë.
Tek lista e fundit, ka tërhequr vëmendje një emër për Bashkinë Tiranë, pikërisht ish-këshilltari i kryeministrit Edi Rama, Endri Fuga.
Pas shumë vitesh nën hije, duket se Fuga tashmë ka dalë në “vijën e parë” politike.
I ftuar në emisionin “zona Zero” në Top News, kryebashkiaku Erion Veliaj deklaroi se Fuga do japë kontributin e tij si një zë i fortë, në mënyrë që publikut t’i komunikohen dhe vendimet e vështira që bashkia duhet të marrë sa më mirë.
Ai e konsideroi një zë të pjekur, e po ashtu një “strateg të komunikim”.
“Shumë njerëz nuk e dinë por shoku, miku im i vjetër Endri Fuga të cilin e njoh që nga veprimtaria ime më shoqërinë civile, vjen nga një familje e angazhuar në shërbimin publik.
Duke filluar që nga gjyshi, nëna e tij, mjeke, i ati, fizikant. Endri ka qenë më në hije, pak më i rezervuar, teksa ne të tjerët më në publik, duke filluar nga Edi Rama, unë dhe disa kolegë jemi më të angazhuar. Por unë besoj se njerëzit vjen një kohë ku duhet të jenë në vijën e parë dhe të thonë atë që mendojnë.
Ai është një zë i pjekur, i kthjellët, një strateg i komunikimit. Do na duhet të bëjmë komunikime të vështira. Unë e them shpesh që puna jonë nuk është t’i pëlqejmë të gjithëve, por t’i shërbejmë të gjithëve.
Dhe për të bërë këtë komunikim të këtyre vendimeve miku im Endri do na japë një dorë se si t’i përkthejmë në gjuhën që njerëzit t’i kuptojmë.
Ky do jetë kandidimi im i fundit. Dhe kemi shumë gjëra për të bërë, prandaj për t’i komunikuar këto gjëra, kontributi i secilit, veçanërisht i Endrit do jetë shumë i nevojshëm”- deklaroi Veliaj.
