Kryetari i Partisë së Lirisë, Ilir Meta e ka cilësuar planin e Belind Këlliçit për transportin publik falas një zgjidhje konkrete për trafikun e rënduar të Tiranës.
Ai shprehet se programi i tij lehtëson trafikun, ndihmon qytetarët dhe veçanërisht ata që janë prekur nga shtrenjtimi i kostove të jetesës.
Meta thotë se ndryshim më 14 Maj do të jetë i pashhmangshëm duke theksuar se bashkë do të fitojnë edhe bashkinë e kryeqytetit.
Postimi i plotë
Plani i Belind Këlliçit për transportin publik falas është zgjidhje konkrete për trafikun e rënduar të Tiranës.
Programi i Kryebashkiakut të ardhshëm të Tiranës për transportin publik falas lehtëson trafikun, ndihmon qytetarët dhe veçanërisht ata që janë prekur nga shtrenjtimi i kostove të jetesës, redukton ndotjen dhe zhurmën dhe shmang vonesat e bllokimet e gjata, që deri sot e kanë vështirësuar shumë jetën e banorëve të kryeqytetit.
Ky plan është edhe pro-individ, edhe pro-biznes, prandaj qytetarët e Tiranës dhe sipërmarrësit e ndershëm do ta mbështesin masivisht atë.
Sot ishim në Njësinë Bashkiake Nr.2 në Tiranë së bashku me deputeten Erisa Xhixho dhe kandidatët për anëtarë në Këshillin Bashkiak Ana Azizaj dhe Besford Dorezi.
Sa më shumë qytetarë që takojmë dhe dëgjojmë aq më tepër jemi të vendosur në synimin tonë, që Bashkia e Tiranës të jetë mbështetëse dhe inkurajuese e mirëqenies dhe përmirësimit të kushteve ekonomike të tyre.
Jo si kjo aktualja, që ua vështirëson të përditshmen qytetarëve e bizneseve, me taksa të rënda për shërbime që nuk jepen. Të gjithë duam Ndryshimin dhe Ndryshimi më 14 Maj do të jetë i pashmangshëm! Bashkë fitojmë Tiranën!
