Mitropoliti i Korçës, Hirësi Joani dhe i Amantias, Hirësi Nathanaili, kryen sot një vizitë në Spitalin “Evangjelismos” në Athinë, ku prej datës 3 janar gjendet i shtruar në gjendje kritike Kryepeshkopi i Shqipërisë, Imzot Anastas Janullatos.
Dy mitropoliotët u takuan me znj. Anastasia Kotanidu, Doktoreshë e Pneumonologjisë dhe Drejtore e Njësisë së Terapisë Intensive të spitalit, për të shprehur interesimin e Sinodit të Shenjtë të Kishës për ecurinë e Fortlumturisë, si dhe falënderim dhe mirënjohje për gjithë kujdesin dhe dashurinë e treguar për të.
Njëherësh, mitropolitët përcollën lutjet e mbarë popullit shqiptar orthodhoks për Kryepeshkopin Anastas por edhe për stafin mjekësor, që me integritet dhe profesionalizëm vazhdojnë përpjekjet për rehabilitimin e shëndetit të tij, pavarësisht faktorëve rëndues.
Kisha Ortodokse, përmes një postimi në faqen e saj zyrtare në Facebook bën me dije se dy mitropolitët u takuan ndër të tjera në spital edhe me Episkopin e Krujës, Hirësi Anastasin, Atë Spiridhonin dhe Atë Harallambin, të cilët shoqërojnë Kryepesjkopin, duke u shprehur atyre solidaritet shpirtëror.
