I dërguari i SHBA-së për Misione të Posaçme, Richard Grenell ka uruar sot Kosovën për 17-vjetorin e Pavarësisë së saj.
Përmes një postimi në platformën “X”, ai theksoi se ky moment historik për Kosovën është errësuar nga një padrejtësi e madhe, për shkak të mbajtjes së Hashim Thaçit në Hagë.
Grenell theksoi se evropianët kanë dështuar të veprojnë kundër “kësaj padrejtësie në pesë vitet e fundit”.
“I uroj të gjithë miqve të mi në Kosovë një festë të gëzueshme dhe të sigurt në 17 vjetorin e pavarësisë së tyre. Megjithatë, ky moment historik është lënë në hije nga një padrejtësi e rëndë. Babai themelues i shtetësisë së Kosovës, presidenti Hashim Thaçi, duhet të festojë sot në Prishtinë – jo pas hekurave në Hagë. Evropianët nuk kanë arritur të veprojnë kundër kësaj padrejtësie në 5 vitet e fundit. Dhe institucionet shtetërore të Kosovës kanë dështuar të ndërmarrin veprimet e nevojshme ligjore për t’i dhënë fund kësaj padrejtësie – për shkak të politikës. Ky burgim i padrejtë duhet të marrë fund”, shkroi Grenell.
I dërguari i Trump e mbyll mesazhin e tij duke shkruar emrin e Jack Smith, prokurorit që burgosi liderët e UÇK. Prokurori i Posaçëm Jack i cili udhëhoqi çështjet federale kundër Donald Trump me akuzat për përpjekje për të përmbysur humbjen e tij në zgjedhjet e vitit 2020 dhe keqpërdorim të dokumenteve të fshehta, dha dorëheqjen në 12 janar, 9 ditë para se Donald Trump të betohej si President i SHBA.
Në lidhje me këtë deklaratë të Richard Grenell, kryeministri Edi Rama ka reaguar në platformën X, duke mbështetur fjalët e dërguarit të posaçëm të Trump.
“Absolutisht! Sa më shumë të vazhdojë, aq më e madhe është njolla në organin ndërkombëtar të drejtësisë,” shkroi Rama.
