Manjola Koni Luku ka shpallur zyrtarisht kandidaturën e saj për garën e primareve të Partisë Demokratike në qarkun e Durrësit, që do të mbahen më 1 mars. Në një postim ne rrjetin social facebook drejtuar demokratëve, ajo ka theksuar se vendimi për të hyrë në këtë garë vjen si një angazhim për t’u përballur me atë që e cilëson si “një regjim të korruptuar”, që ka dëmtuar ekonominë dhe ka lënë qytetarët në varfëri.
Ajo ka kërkuar mbështetjen e demokratëve për të qenë “zëri i ndryshimit” dhe për të rikthyer shpresën, vlerat dhe dinjitetin për qytetarët.
Postimi i plotë:
Të nderuar demokratë dhe demokrate të qarkut Durrës,
Kam vendosur të jem pjesë e garës së primareve të 1 marsit, për të vazhduar përballjen me këtë regjim të korruptuar, i cili ka shkatërruar ekonominë, ka lënë qytetarët në varfëri dhe ka penguar zhvillimin e vendit tonë.
Kërkoj mbështetjen tuaj për të qenë zëri i ndryshimit, zëri i një të ardhme më të mirë, me më shumë mundësi, investime dhe dinjitet për çdo qytetar. Së bashku mund ta rikthejmë shpresën dhe vlerat e humbura nga keqqeverisja dhe abuzimi me pushtetin!
Besoj fort te vlerat e lirisë, drejtësisë dhe zhvillimit, dhe me mbështetjen tuaj, do të punoj për një Shqipëri më të fortë, më të ndershme dhe më të begatë!
Fitorja e Partisë Demokratike do të nisë nga Durrësi!
