Futbollisti i Kombëtares, Julian Shehu, foli në një lidhje live nga Polonia për emisionin Max Sport.
Ai tregoi emocionet e aktivizimit të tij të parë me Kombëtaren dhe shpërthimin me golat në kampionatin polak, ku menjëherë pas ndeshjes së zhvilluar me Andorrën, ka shënuar tre gola në po aq ndeshje me ekipin e Widzew Lodz.
Futbollisti Julian Shehu tha se aktivizimi me Kombëtaren është kulmi i karrierës për të.
“Kam 3 vite në Poloni. Fillimi ishte i vështirë dhe, pas dëmtimit, gjithçka ka qenë perfekte. Jam shumë i lumtur. Jam i kënaqur; kontrata mbaron vitin tjetër. Emocionet ishin në debutimin me Andorrën, por jo aq sa të më bllokonin, u ndjeva mirë në fushë. Jam 26 vjeç tani, nuk jam më aq i ri sa për të ndier bllokim nga emocionet. Pozicioni im natyral është para mbrojtjes, por, në varësi të trajnerëve, mund të luaj edhe pak më i avancuar megjithëse unë ndihem më mirë kur luaj para mbrojtjes. Për mua, Kombëtarja ishte kulmi i karrierës – një ëndërr e bërë realitet. Tani kam më shumë vetëbesim në fushë pas ndeshjes me Kombëtaren,” – tha Shehu.
