Gazetare: Jonida Omeri
Përfaqësuesit e dy partive më të mëdha në vend, që po monitorojnë nga afër procesin e votimit të diasporës, komentuan për RTSH organizimin dhe zbatimin teknik.
Të dyja palët shprehën rezerva për transparencën dhe përgatitjen teknike të kompanisë kontraktore, që po menaxhon votimin jashtë vendit.
“…refuzimi i postierëve për të marrë zarfin mbrapsht. Në disa raste, neglizhenca e postierëve për të shkuar në adresë. Do kisha rezervat e mia për sa kohë që po artikuloj problematikat. S’mund të them që po e bën punën shkëlqyeshëm. Nga ana tjetër, nuk duhet të harrojmë që kemi të bëjmë me [shqiptarë] të shpërndarë në të gjitha anët e botës,” tha Elena Xhina, përfaqësuese e Partisë Socialiste.
“Brenda zarfit nuk është gjetur fletë votimi. I është dhënë zarfi zgjedhor një personi i cili nuk ka qenë vetë. Nga ana e shërbimit postar DHL janë nënkontraktuar disa operatorë të tjerë në vende të ndryshme, të cilët po e kryejnë shërbimin. Në qoftë se DHL-ja do të procesonte me operatorë të tjerë apo me kontraktime do duhej që kjo gjë të ishte ditur paraprakisht,” shtoi Marash Logu, përfaqësues i Partisë Demokratike.
Pavarësisht problematikave, dy zyrtarët u shprehën besimplotë te ajo pikë e procesit që lidhet me fshehtësinë e votës.
“Të gjithë zgjedhësit duhet ta dinë se nuk ka asnjë mënyrë se si të identifikohet mënyra si ata kanë votuar dhe për këtë duhet të jenë krejtësisht të qetë,” tha z. Logu.
“Pavarësisht problematikave me dërgimin dhe marrjen e zarfeve, garancia dhe fshehtësia nuk lidhen me këto problematika. Ato janë të garantuara për sa kohë që janë të monitoruara,” u shpreh znj. Xhina.
Përmes mikrofonit të RTSH, palët bëjnë thirrje për emigrantët që të respektojnë rregullat dhe të mos fotografojnë votën si një mënyrë për të ruajtur integritetin e procesit.
