Pas vetëm dy ditësh votimesh në konklavën e mbledhur në Kapelën Sistine, Kisha Katolike ka zyrtarisht Papën e ri. Tymi i bardhë u ngrit nga oxhaku i Kapelës, duke konfirmuar se kardinalët kanë arritur marrëveshje për zgjedhjen e pasardhësit të Papa Françeskut, i cili ndërroi jetë më 21 prill.
Papa i ri u zgjodh në raundin e pasdites së ditës së dytë të konklavës, duke siguruar të paktën 89 vota, shumicën e nevojshme prej dy të tretash për t’u shpallur kreu i ri i Selisë së Shenjtë.
Qindra mijëra besimtarë të mbledhur në Sheshin e Shën Pjetrit shpërthyen në duartrokitje dhe lutje sapo u pa tymi i bardhë që prej shekujsh simbolizon zgjedhjen e Papës. Pritet që brenda pak orësh, emri i Papës së ri dhe titulli i tij papnor të shpallen zyrtarisht nga ballkoni i Bazilikës së Shën Pjetrit.
Kjo zgjedhje vjen në një moment sfidues për Kishën Katolike, e cila përballet me sfida globale të besimit, reformave të brendshme dhe rolit të saj në shoqëritë moderne. Zgjedhja e shpejtë, brenda vetëm dy ditësh, e vendos këtë konklavë mes më efikasëve të dekadave të fundit, ngjashëm me atë të Papa Françeskut në vitin 2013.
Mbetet të shihet vizioni dhe drejtimi që do të sjellë Papa i ri, i cili do të drejtojë mbi 1.3 miliardë katolikë në mbarë botën.
