Fundjava e fundit e majit do të sjellë në zemër të Zvicrës një ngjarje kulturore të veçantë për komunitetin shqiptar atje dhe jo vetëm. Më 31 maj dhe 1 qershor, në ambientet e Espace Dickens në Lausanne, do të organizohet festa dyditore “Kujtime nga Atdheu – Festë me Miq”, një aktivitet që vjen në kuadër të nismës së Ministrisë së Ekonomisë, Kulturës dhe Inovacionit, CulturAlb, kushtuar ruajtjes dhe promovimit të trashëgimisë kulturore shqiptare në diasporë.
Eventi organizohet nga Swiss Albania Event dhe bashkon artin, edukimin dhe familjen në një hapësirë ku kultura shqiptare frymon përmes aktiviteteve të ndryshme.
Festa nis të shtunën, më 31 maj, me shfaqjen e filmit të dashur për breza të tërë, “Taulanti kërkon një motër”, që do të transmetohet në orën 19:00. Mbrëmja do të pasohet me një pritje për fëmijët dhe familjet, ku bisedat miqësore do të përzihen me kujtimet dhe ëndrrat e një brezi të ri që po mëson të dashurojë gjuhën dhe rrënjët.
E diela e 1 qershorit që përkon me Ditën Ndërkombëtare të Fëmijëve do të jetë e mbushur me aktivitete të strukturuara në pesë pjesë krijuese dhe edukative. Fëmijët do të kenë mundësi të shfaqin talentin e tyre nëpërmjet ekspozitës “Kujtime nga Atdheu”, ku do të prezantohen punimet e tyre artistike kolazhi të frymëzuara nga trashëgimia shqiptare. I ftuari special i ditës është Rafael Shehi, artisti i vogël që jeton në Lyon, Francë.
Një nga momentet më të veçanta do të jetë edhe krijimi i veprës kolektive “Pema e Jetës”, me tapa verërash shqiptare, simbol i lidhjes me natyrën, rrënjët dhe traditën shqiptare. Kjo vepër do t’u dhurohet restoranteve shqiptare në Zvicër si një kujtesë artistike për të ruajtur identitetin në çdo hapësirë publike.
Në orët e mesditës, do të zhvillohet ceremonia e çertifikimit për fëmijët pjesëmarrës në konkursin artistik që ka qenë i hapur që nga muaji mars, si dhe promovimi i aplikacionit edukativ “Mësojmë Shqip – Bubi”, një mjet modern për fëmijët e diasporës që duan të mësojnë gjuhën amtare në mënyrë argëtuese.
Pjesa e fundit e programit do të sjellë workshop-e muzikore dhe kulturore, me fokus në trashëgiminë e pasur shqiptare, përfshirë vallet popullore shqiptare.
