Ministri për Marrëdhëniet me Parlamentin, Taulant Balla deklaroi sot në Kuvend se qeveria ka shënuar përparim të ndjeshëm në bujqësi dhe zhvillimin rural, duke theksuar se eksportet bujqësore janë trefishuar krahasuar me periudhën kur qeveriste opozita aktuale.
Ai theksoi gjithashtu se janë mbi 1000 projekte aktive në zonat rurale, nga të cilat rreth 300 janë njësi agroturizmi, një koncept që sipas tij, “nuk ekzistonte fare në kohën e qeverisë së mëparshme.” Qëllimi i qeverisë, sipas ministrit, është që ky numër të arrijë në 1000 njësi agroturizmi në gjithë territorin.
“Janë trefishuar eksportet bujqësore. Nëse në kohën e PD, importonim 9 kg domate, sot importojmë 3 kg. Në fshatra, janë mbi 1000 projekte, ku janë rreth 300 agro-turizëm. Në kohën tuaj s’kishte agro-turizëm. Ne synojmë 1000 njësi agro-turizëm.
Fshati llafe nuk ka. Ne kemi shkuar në 300 mijë hektarë sot, që kanë sistem vaditës. Duam të mbyllim nevojën e çdo familjeje që jeton në fshat për vaditjen. Transformimin e bujqësisë në vend mund ta bëjë vetëm PS”, tha Balla.
