Shkruan Ermal Qori
Në Shqipëri ekziston një Universitet që nuk gjendet askund tjetër në botë, dega: shofer, grada idiot, dhe me treg të gjerë pune.
Profesionistët e rinj gjenden kudo: në rrugët interurbane, mes për mes qytetit, kryqëzime, në rrugicat e lagjeve, madje edhe në trotuare. Ata punojnë non-stop; thuhet se ka nga ata që përfundojnë me të katërta rrotat brenda shtëpisë apo biznesit teksa punojnë, kryesisht në orët e vona të natës… por jo vetëm.
E keqja e tyre më e madhe është se nuk e njohin orarin. Ata, nga pasioni për punën, i bien borisë vend e pa vend. I dëgjon poshtë pallatit, i dëgjon kur ke fëmijën në gjumë, i dëgjon kur ke prindër të sëmurë; po, po, edhe në mbledhje, edhe në tualet. Futu ku të duash ti, ata i dëgjon, sidomos kur mendon të lexosh një libër: sa nis të lexosh ti, fjalia të rrotullohet dhjetë herë, se “ti, ti, ti”-ja s’të lë trurin rehat.
Të diplomuarit klasifikohen sipas eksperiencës. Në autostrada janë ata me gradën Idiotë me master që dhurojnë spektakël: ngjiten pas makinës tënde, i bien borisë, ndezin dritat, hapin xhamin, thonë një shprehje pellazge që fillon me “tq…”. Pikërisht këta respektohen edhe nga policia më tepër, ndaj, kur t’i shihni, jepini respektin e duhur nëse s’doni t’ju dalë emri në ndonjë gazetë, televizion apo afishe: Në kujtim të…
Ka ende të tjerë, p.sh: Idiotë me talent mesatar. Nuk janë shumë agresivë, veçse këta parkojnë vend e pa vend, fikin makinën në mes të rrugës sikur ta kenë pronë të babës, bllokojnë trotuare me pretendimin se këmbësori po u zë rrugën.
Jam miku i Qazimit është kategoria e specialistëve: ata njohin këdo dhe gjithçka. Mjafton t’i kapësh në flagrancë dhe do të dëgjosh përralla. Nisin presionin duke telefonuar Qazon (një Zot e di se kush është, por ata provojnë presionin).
Që të mos infektoni veten dhe (larg qoftë) të lini jetën e fatin në duart e tyre, denonconi dhe raportoni çdo idiot me patentë, përpara se të jetë shumë vonë!
