Përveç TIMS, hakerat dëmtuan edhe sisteme të tjera të Policisë së Shtetit. Një javë pas ngjarjes, vijon të jetë i bllokuar sistemi i gjobave të kundravajtjeve rrugore dhe i dy sistemeve të brendshme të bluve, MEMEX dhe ADAMS, të cilët shërbëjnë për të mbajtur të dhëna për eksponentë kriminal dhe referim të ngjarjeve.
Sulmi i dytë kibernetik i ditëve të fundit ndaj sistemeve të Policisë së Shtetit nuk ishte vetëm ndaj TIMS, por edhe atyre që përdoren për përdorim të brendshëm nga blutë. Një prej tyre, i cili që prej datës 10 shtator nuk është kthyer në funksion është sistemi i gjobave të automjeteve. Qytetarët që gjobiten në ditën e fundit për të gjitha kundravajtjet rrugore, nuk mund të paguajnë gjobën e tyre pasi sistemi nuk ka akses në asnjë pikë postare. Kjo sjell në rritje të pagesës së gjobës si pasojë të kamatvonesës derisa sistemi të rikthehet sërish në funksion. I njëjti problem është edhe për verifikimin e makinave të dyshuara si të vjedhua apo të përfshira në ngjarje të tjera kriminale.
Jashtë funksionit është edhe sistemi MEMEX, i njohur ndrsyhe si Sistemi i Menaxhimit të Informacionit Kriminal. Ai mbanë të dhëna sekrete të policisë mbi çdo eksponent kriminal dhe shërben për marrjen dhe transmetimin e njoftimeve për ngjarjen kriminale të ndodhur, informacionit policor si dhe të dhënave për personat e implikuar në këto ngjarje.
I treti, por jo më pak i rëndësishmi është edhe sistemi ADAMS, i cili rezulton të jetë akoma jashtë funksionit, ruan të gjitha të dhënat dhe referimet e plota të ngjarjeve kriminale. Në të shënohen raportimet që nga lajmërimi i çdo ngjarje deri në momentin e referimit të dokumentacionit të plotë në prokurori.
E bllokuar vijon të jetë edhe faqja zyrtare e Policisë së Shtetit, asp.gov.al, përmes së cilës qytetarët nuk kanë akses që prej datës 10 shtator.
Aktualisht sistemi TIMS është rikthyer në funksion në të gjitha pikat kufitare të vendit, ndërsa burime nga policia bëjnë me dije se nuk hasen probleme dhe hyrja dhe dalja e qytetarëve vijon të bëhet pa problem, që prej rikthimin në funksion të plotë.
