Me zgjerimin e tregut skuadrat e Kategorisë Superiore e kanë shumë të vështirë të mbajnë lojtarët, që shkëlqejnë për shkak të konkurrencës së frikshme, që bëjnë ligat e forta europiane. Burime konfidenciale pranë klubit bëjnë me dije për “Panorama Sport” se në tavolinën e presidentit të Partizanit, Gazment Demi, ka mbërritur një ofertë për një nga lojtarët më të mirë të kampionatit, Masanga Matondo
Mesfushori prej një sezoni e gjysmë shkëlqen me fanellën e kuqe dhe kjo nuk ka kaluar pa u parë nga trajneri i Hatajspor, Volkan Demirel, i cili e ka pikasur kongolezin në derbin e fundit dhe është paraqitur në klubin e kuq me një ofertë prej rreth 250 mijë eurosh.
Kontrata e Matondos përfundon në verën e ardhshme dhe kjo shihet si mundësia e fundit për klubin e kuq për të nxjerrë para nga shitja e tij. Vetë Matondo, me kurorëzimin kampion, ndien se ka ardhur momenti për një hap më të madh në karrierë dhe Superliga turke është një kapërcim gjigant për 23-vjeçarin.
Ai i ka kërkuar drejtuesve të kuq ta mirëkuptojnë dhe të pranojnë ofertën e ardhur nga Turqia, çka do të kënaqte të dyja palët. Paga e Matondos në Turqi do të shkonte rreth 15 mijë euro në muaj, e pakrahasueshme me këtë që merr te Partizani.
Gjithsesi, për momentin klubi i kuq e ka refuzuar shitjen, pavarësisht këmbënguljes së lojtarit. Ata kërkojnë një shifër minimalisht të dyfishuar, teksa nga ana tjetër mundohen edhe të negociojnë rinovimin. Matondo kërkon me këmbëngulje aventurën turke.
PANORAMASPORT.AL
