Tedi Blushi është betuar ditën e sotme si këshilltar bashkiak në Tiranë. Në një status në rrjetet sociale, ai shkruan se nga sot nis një angazhim i ri, me përgjegjësi për t’u shërbyer qytetarëve.
Blushi thekson se do të jetë gjithmonë në mbrojtje të interesit publik, demokracisë, llogaridhënies dhe transparencës.
“MANDATI DHE MERITA ËSHTË E JUAJA, PËRGJEGJËSIA ËSHTË E IMJA!
Faleminderit nga zemra për çdo qytetar të Tiranës që më 14 Maj votoi për Ndryshimin, veçanërisht për këdo që ka sakrifikuar kaq shumë në opozitë dhe që ka vuajtur në këto vite nga dhuna, arbitrariteti, braktisja dhe vjedhja e taksave nga Bashkia e Tiranës!
Mirënjohje për besimin e dhënë nga Kryetari, forumet drejtuese dhe anëtarësia e Partisë së Lirisë, që pranuan kandidimin tim!
Nga sot nis një angazhim të ri shumë të rëndësishëm dhe me përgjegjësi, si anëtar i Këshillit Bashkiak të Tiranës për t’u shërbyer qytetarëve me dinjitet deri sekondën e fundit të mandatit, gjithmonë në mbrojtje të interesit publik, demokracisë, llogaridhënies dhe transparencës!”, shkruan Blushi.
