Qeveria duket se ka bërë një hap pas për daljen nga Gjykata e Arbitrazhit Ndërkombëtar, hap ky i paralajmëruar nga kryeministri Edi Rama disa muaj më parë.
Ndryshe deklaroi sot në Kuvend ministri i Drejtësisë, Ulsi Manja u shpreh se nuk ka nisur asnjë procedurë e tillë, duke ngritur pretendimin se deklarata e kryeministrit është nxjerrë nga konteksti.
“Nuk ka asnjë kërkesë dhe asnjë hap të qeverisë shqiptare për të dalë nga marrëveshjet ndërkombëtare të arbitrazhit. Deklarata e kryeministrit është nxjerrë jashtë kontekstit”, deklaroi Manja.
Nga ana tjetër, duke iu përgjigjur deputetëve të opozitës në Kuvend, Manja tha se qeveria shqiptare nuk ka lëvruar asnjë qindarkë për paratë që duhet t’i paguajë Bechettit, pas humbjes së gjyqit në Arbitrazh. “Zero lekë dhe zero euro të paguara për Becheetin”, tha ai.
Çfarë thoshte Rama disa muaj më parë
Pasi humbi betejën në Arbitrazh për çështjen Becchettti, Kryeministri Edi Rama paralajmëroi në muajin prill, daljen e Shqipërisë nga juridiksioni i kësaj gjykate. Ai u shpreh se shqiptarët duhet të revoltohen nga ky vendim skandaloz, ndërsa shtoi se po shikojnë mundësinë e daljes së nga juridiksioni i Gjykatës së Arbitrazhit.
“Duke filluar nga java e ardhshme nga e cila madje po analizojmë mundësinë e daljes fare në juridiksion sepse është skandaloze fare ajo që ka ndodhur. Po këta njerëz që flasin sot u kanë thënë shqiptarëve dy vite më parë se Shqipëria i ka paguar ato para”, deklaroi Edi Rama.
