Kristjan Asllani ishte një nga lëvizjet më bujshme të legjionarëve në këtë merkato vere. Mesfushori kuqezi u transferua nga Empoli tek Inter për 14 milionë euro, një lëvizje për të cilën u përfol jashtëzakonisht shumë. Në sytë e opinionin sportiv në Itali, Asllani shihej si një nga talentet më premtues, në sytë e Inzaghit shihej si pasuesi ideal i Brozovic, madje më shumë se kaq, por realiteti dhe shifrat janë shumë larg këtij perceptimi.
Deri në këtë pikë të sezonit, në të gjitha kompeticionet, Asllani është aktivizuar vetëm 29 minuta në total, lojtari i dytë me më pak minuta pas Raoul Bellanova. Në çdo moment të vështirë që Inter ka kaluar gjatë këtij sezoni, tifozët dhe opinioni sportiv në Itali kanë shtruar një pyetje: Ku ka përfunduar talenti Asllani? Vet futbollisti kuqezi duhet i qetë: “Do të vijë edhe momenti im”.
Në pritje të më shumë minutave me Inter, Asllani ka shansin ideal të startojë si titullar me përfaqësuesin kuqezi. Në fakt, as Edy Reja nuk e ka pasur preferencë të parë, sigurisht ka qenë vetëm fillimi i aventurës së tij me Kombëtaren, por vështirë të mendosh se edhe Reja e ka luksin, ashtu si Inzaghi, të mbaj në stol një lojtar si Asllani. Ndaj Izraelit dhe Islandës janë dy sfida ku kërkohet fitorja, mbase tani ka ardhur momente që Asllani të marrë në dorë mesfushën kuqezi për të treguar të gjithë potencialin e tij.
