127 persona janë riregjistruar për të marrë patentën, pasi e kanë humbur atë pas shkeljeve të shumta në qarkullim. Por, nga këta 127, në 2 muaj e gjysmë vetëm 5 ia kanë dalë të marrin patentën, ku sipas Drejtorit të Përgjithshëm të Shërbimit të Transportit Rrugor, Blendi Gonxhja nuk ka reflektim nga ana e tyre.
Me anë të një postimi në Facebook, Gonxhja tha se riedukimi në autoshkolla është e vetmja mënyrë që këta persona, pas testimit, të rimarrin patentën.
“Nuk po reflektohet nga ata që humbin pikët e patentës! Nga 127 të riregjistruar, në 2 muaj e gjysmë, referuar nga Policia, vetëm 5 kanë rifituar Leje Drejtimin! Vetëm 1 kalues sot në Testin e rimarrjes së Leje Drejtimit pas humbjes së pikëve, në seancën e 7-të që nga zbatimi i dispozitës së re shtrënguese me rikthim në Autoshkollë, nga 21 kandidatë për këtë seancë, ku u paraqitën në sallë vetëm 8 veta! S’KA SHPËTIM përveç RIEDUKIMIT për ata që ne i konsiderojmë kontingjent shkelësish të rëndë të rregullave të qarkullimit, përsëritës në sjellje që rrezikojnë ata dhe të tjerët në rrugë, që me aktet e reja në fuqi për të rifituar të drejtën e patentës duhet të regjistrohen nga e para në Autoshkollë e t’i ri nënshtrohen testit teori-praktikë! Koka bën, koka pëson! Konkluzioni: respektoni normat e qarkullimit rrugor sepse nëse do t’i humbni të gjitha pikët, do të riktheheni në Autoshkollë dhe më pas nën monitorim të rreptë do të rifitoni patentën vetëm nëse nuk keni mbi 3 gabime në pyetësorin e Normave të Sjelljes me 30 fjali si edhe nëse kaloni në testin e praktikës! Këtë kohë, angari e kosto mund t’ia shmangni vetes duke u sjellë korrekt në timon! Ju jeni problemi dhe po ju jeni zgjidhja”, u shpreh Gonxhja.
Heqja e pikëve të patentës hyri në fuqi një vit më parë me ndryshimet e Kodit Rrugor. Kryesisht humbasin pikë ata shoferë që konsiderohen si më të rrezikshëm në rrugë dhe kryejnë manovra të këqija. Një shofer kur pajiset me patentë ka në dispozicion 20 pikë, të cilat mund t’i zbriten ose rriten në varësi të sjelljes së tij në rrugë. Shkelja më e rëndë që parashikon heqjen njëherësh të 15 pikëve që me herën e parë është ajo kur shoferi nuk zbaton detyrimin e ndalimit në rast aksidenti me dëme në njerëz.
10 pikë hiqen kur shoferi nuk pranon të paraqesë dokumentacionet që i kërkon policia, nuk ndalon në postblloqe, qarkullon nën ndikimin e narkotikëve, nuk ndalon ose nuk lejon të kalojnë emergjencat dhe qarkullon me mjet transportues mallrash pa zbatuar rregullat e sigurisë. Më tej renditen edhe shkeljet më të buta, për të cilat hiqen më pak pikë. Për këto shkelje, por edhe të tjera, kur ripërsëriten brenda një viti, vlera e pikëve të hequra shtohen.
Një pit-stop edukativ është parashikuar për shkelësit me pasojë të lehta në rrugë, në momentin kur kryejnë rinovimin e patentës. Ndryshimet në Kodin e ri Rrugor kanë parashikuar që të shpërblejnë edhe ata që janë model i mirë në rrugë. Nëse brenda 2 vitesh nuk kryen shkelje, atëherë në patentë shtohen 2 pikë për çdo 2 vjet, deri në një maksimum prej 30 pikësh.
