Futbolli është pa mëdyshje sporti më popullor në botë. Njëkohësisht është një nga sportet ku paguhet më mirë, veçanërisht në nivelet më të larta. Kjo ka krijuar përshtypjen se të gjithë lojtarët e mëdhenj bëjnë një jetë përrallore. Në njëfarë mënyre mund të jetë e vërtetë, por nuk është kështu nëse do të pyesësh ish-sulmuesin e Realit të Madridit dhe Juventusit, Gonzalo Higuain.
Argjentinasi luan për Inter Majamin në kampionatin amerikan MLS League, dhe gjatë një interviste të dhënë për “TyC Sports”, ka rrëfyer se jeta e futbollistëve nuk është ashtu siç perceptohet nga publiku i gjerë. Ai ka rrëfyer për kritikat e ashpra me të cilat përballen futbollistët, duke hedhur poshtë mitin e “një jetë të lehtë”.
“Nëse po më pyet mua, po them se kam përjetuar 15 vite jonormale. Njerëzit mendojnë se ne futbollistët kemi një jetë shumë të lehtë, fitojmë shumë para dhe kjo është e gjitha. Por në fakt nuk është kështu. Ne bëjmë një jetë m*ti. Nuk besoj se është e bukur të dalësh rrugëve e të përballesh me gjithfarë ofendimesh pa pasur asnjë mundësi për të reaguar”, ka thënë “El Pipita”.
Ish-sulmuesi i Napolit, Juventusit, Çelsit, Milanit, Realit të Madridit ka denoncuar në intervistën e tij se: “Ne futbollistët nuk kemi asnjë të drejtë të ankohemi, kur dalim nëpër rrugë dhe na ofendojnë. Nëse do ta bënim një gjë të tillë dënimi për ne do të ishte dyfish. Nëse humbet një ndeshje, humbet një gol, nuk mund të dalësh në rrugë. Një lojtar futbolli është i kushtëzuar nga rezultati. Por njerëzit e ngatërrojnë shpesh sportin me gjërat e tjera. Të gjithë jemi qenie njerëzore e si të tillë mund të gabojmë”.
Tani pas një karriere të gjatë dhe pjekurisë së plotë si njeri, Gonzalo Higuain ka reflektuar dhe ka paralajmëruar se nuk toleron asnjë nëpërkëmbje. “Më duhet e padrejtë që kam luajtur për 15 vjet në elitë pa pasur mundësinë t’u kundërvihem personave që më kanë ofenduar thjesht për hobi apo për të shfryrë zhgënjimet e tyre. Në këtë moment të jetës nuk toleroj më askënd. E kam pësuar vetë nga persona anonimë që qëndrojnë pas një kompjuteri në rrjetet sociale me profile false. Nuk duhet të tolerojmë më, sepse persona të tillë mund të shkatërrojnë jetën një njeriu apo familjeje”, ka thënë Higuain.
