Inkriminimi i administratës dhe strukturave shtetërore mbetet një ndër problemet kryesore në Shqipëri.
Më e rëndë bëhet situata kur institucionet që kanë detyrë të ruajnë rendin dhe sigurinë janë të përfshira në afera kriminale.
Por shumë më e rëndë bëhet situata kur të inkriminuar janë ata që mbikëqyrin dhe vetë institucionet ligjzbatuese.
Pak ditë më parë në kuadër të një operacioni ndërkombëtar, SPAK në bashkëpunim me partnerët e huaj ka zhvilluar kontroll banese për disa persona të cilët kanë qenë të dyshuar.
Një nga personat që i është bërë kontroll banese është dhe shtetasi S.I., aktualisht shofer i drejtorit të Agjencisë së Mbikëqyrjes Policore, Ardi Veliu.
Sipas burimeve nga SPAK për Vox News mësohet se në shtëpinë e shoferit të ish-drejtorit të Përgjithshëm të Policisë janë gjetur sasi floriri të padeklaruara dhe një laptop i vjedhur, që sipas burimeve i përket një politikani të lartë në Shqipëri.
Për arsye të sekretit hetimor nuk po e publikojmë emrin e operacionit dhe as detaje të tjera, pasi hetimi është në proces.
Deri tani, SPAK nuk ka asnjë njoftim zyrtar në lidhje me këtë operacion, pasi drejtimin e kanë partnerët ndërkombëtarë.
Një muaj më parë ish-Drejtori i Përgjithshëm i Policisë së Shtetit, Ardi Veliu u emërua si drejtuesi i ri i Agjencisë së Mbikëqyrjes Policore ku zëvendësoi në këtë post Muhamet Rrumbullakun, që u emërua Drejtor i Përgjithshëm i Policisë për të zëvendësuar Gledis Nanon.
AMP është agjencia që ruan dhe monitoron policët.
Po rojet e rojeve kush i ruan?
