Arrestimi i mjekut në spitalin e traumës ka shkaktuar reagime në shoqëri dhe përfaqësues të medias.
Nëpërmjet një statusi në Facebook, gazetari dhe pedagogu Emirjon Senja e ka quajtur turp dhe spektakël mënyrën se si është arrestuar mjeku.
“Mjekët, policët, mësuesit janë grupet me nivele pagash mizerabël, imagjino pastaj të përballen me çmime si këto që po hasim tani.
Si mund të pretendosh që një mjek apo polic me pagë as 600 mijë lekë të vjetra të mos tundohet nga krimi duke u bërë badigard i kriminelëve apo nga zarfet dhe paratë në xhepin e bluzës së bardhë?!
Rritini pagat mjekëve, mësuesve dhe policëve! Bëjini të jetojnë me dinjitet dhe pastaj çojini maskat me anti-plumb t’i arrestojnë në mënyrë spektakolare duke i degjeneruar para opinionit publik!
Ka plotë profesionistë të mirë nëpër spitale, komisariate apo shkolla, ashtu siç ka horra, por njeriu duhet trajtuar me dinjitet në radhë të parë pastaj i kërkon llogari.
Nuk ka turp më të madh për një shoqëri që degjeneron mjekun, mësuesin dhe policin diku duke e tallur në rrugë, diku duke i vënë prangat në sytë e pacientëve dhe kolegëve e diku tjetër duke i mbyllur shkollën”-Shkruan Senja.
